Səlçuk Bayraktar Bakıya gəlib. Bu haqda bu gün, 7 fevral tarixində Bakuplus.az Report-a istinadən xəbər verir.
Paytaxtda keçiriləcək Aerokosmik və Texnologiya Festivalının təşkil olunmuş mətbuat konfransında çıxış edən “türk dronlarının atası” hamını tədbirə qoşulmağa dəvət edib.
“2018-ci ildə festival başlayanda 20 min tələbə qoşuldu. Hazırda “Teknofest” 1,2 milyonluq iştirakçı ilə dünyanın ilk geniş aerokosmik və texnologiya festivalıdır. Unutmayaq ki, müstəqilliyimiz üçün milli müdafiə sənayesi əsas şərtdir. Məqsədimiz texnoloji gələcəkdir. Azərbaycanın formalaşmasında sizin də rolunuz olsun”, - deyə o çıxışında bildirib.
Daha sonra, o, Prezident Rəcəb Tayyib Ərdoğan və Prezident İlham Əliyevə, eləcə də tədbirə dəstək verən hər kəsə öz minnətarlığını bildirib.
“Teknofest” Aerokosmik və Texnologiya festivalı 26-29 may tarixlərində Bakıda keçiriləcək.
