Bakıda yataqxana tipli binalardan mənzil alanlar risklərlə qarşılaşa bilərlər. Bu haqda daşınmaz əmlak bazarı üzrə ekspert Elnur Fərzəliyev 11 yanvar tarixində Report-a açıqlama verib.
Bakıda yataqxana tipli binalarda ucuz qiymətə ev alanlar sonradan problemlərlə qaşılaşa bilərlər. Ekspertin sözlərinə görə, Sovet vaxtından qalan və bəzi müəssisələrin balansında olmuş ailə yataqxanalarının çoxu balansdan çıxarılıb və özəlləşdirilib. Bu yataqxanalardan ev almaq istəyənlər risklə qarşılaşmırlar. Belə mənzillərin alışı zamanı sənədlərə baxmaq lazımdır.
Tələbə yataqxanalarından mənzil almağa gəlincə, ekspert bunun riskli olduğunu qeyd edib. Tələbə yataqxanalarındakı mənzilləri alan vətəndaş bilməlidir ki, bu yataqxana dövlətindir və balansından çıxarılmayıb. Həmin binalar artıq istismar müddətini bitirib, yararsız vəziyyətdədir. Bir müddətdən sonra onlar söküləcək və vətəndaşlara dövlət tərəfindən heç bir kompensasiya verilməyəcək.
“Həmin binalardakı evləri digər şəxslərə satmaq qanuna ziddir: Belə binalar şəhərdə çoxdur”, - Elnur Fərzəliyev bildirib.
