Paytaxtın Xətai rayonu, Neapol 21, M1 ünvanında yaşayan sakinlər yolların vəziyyətindən şikayətçidirlər. Bu haqda bu gün, 17 yanvar tarixində Bakuplus.az APA-ya istinadən məlumat verir.
Uzunluğu 1 kilometr olan yol bərbad vəziyyətdədir. Asfalt örtüyü dağılıb, quyular əmələ gəlib.
Həmçinin, ərazidə yerləşən kanalizasiya quyusunun qapağı yoxdur. Sakinlərin sözlərinə görə, dəfələrlə avtomobil kommunikasiya quyusuna düşüb.
Azərbaycan Avtomobil Yolları məsələdən xəbərdar olduqlarını bildiriblər.
”Həmin əraziyə əməkdaşlarımız baxış keçirib. Ərazi ara küçə olduğu üçün bu yol rayon icra hakimiyyətinin balansındadır. Həmin ərazidə hər hansı iş görmək bizim səlahiyyətimiz çərçivəsində deyil”, - deyə İctimaiyyətlə əlaqələr şöbəsinin rəisi Anar Nəcəfli qeyd edib.
Rayon İcra Hakimiyyətindən isə bildirdilər ki, həmin yola 2 il öncə asfalt çəkilib, ancaq digər idarələr orada kommunikasiya xətlərini dəyişdirəndə bu hal yaranıb.
“Bununla bağlı onlara xəbərdarlıq etmişik ki, bu yolun təmirini də həll etsinlər”, - deyə Qurumun şöbə müdiri Pənah İmanov bildirib.
