Xətai rayonunun Cavanşir küçəsi 9 ünvanında yerləşən binanın pilləkən qəfəslərini 1-ci mərtəbədən 5-ci mərtəbəyə kimi buxar bürüyüb. Bu haqda Xəzər Xəbər 7 yanvar tarixində reportaj hazırlayıb.
Burada yaşayan sakinlər binanın istilik sistemində yaranan problemdən şikayətçidirlər. Binanın zirzəmisində olan istilik sisteminin xətlərində yaranan problem səbəbindən buxar birbaşa giriş hissəyə vurur, və nəticədə sakinlər mənzillərinə getməkdə çətinlik çəkirlər.
Sakinlərin sözlərinə görə, "Azəristiliktəchizat'' ASC-nin əməkdaşları xətdə problem yarandığından binaya verilən istiliyi dayandırıblar. Bu da sakinlər üçün bu soyuq günlərdə əlavə problem yaradıb.
Məsələ ilə bağlı Xətai rayonu İstilik Sistemləri İstismar Sahəsinin rəisi Ərəstun Əsgərov bildirdi ki, qurumda problemdən xəbərdardırlar. Lakin, binanın zirzəmisi su ilə dolduğundan, istilik xətlərinə müdaxilə etmək mümkün olmur.
Xətai rayon İcra Hakimiyyətindən isə bildirildi ki, sakinləri narahat edən problem qısa vaxtda həll ediləcək.
