Xətai rayonunda Vətən müharibəsi şəhidi kapitan Nəcəf Şikarovun xatirəsinə tikilən abidə kompleksinin açılışı olub.
Report-a istinadən xatirə abidəsi şəhidin vaxtilə yaşadığı General Şıxlinski küçəsi 49 ünvanında inşa olunub. Açılış mərasimində şəhidlərin ailələri, dostları, İcra Hakimiyyətinin nümayəndələri və digər rəsmi şəxslər iştirak ediblər. Şəhidin müharibədə göstərdiyi qəhrəmanlığından danışılıb. Mərasimdə məktəblilərin ifasında ədəbi-bədii kompozisiya nümayiş etdirilib.
Nəcəf Şikarov Şuşa-Xocavənd döyüşlərində iştirak edib. 9 noyabr tarixində Füzuli rayonunun Alxanlı kəndi istiqamətində mühasirəyə düşən əsgər və zabit heyətinə yardım etmək üçün düşmən səngərinə daxil olub. İki ermənini silahla, digərini əlləri ilə boğaraq öldürüb. Lakin düşmən gülləsi onu şəhidlik zirvəsinə ucaldıb. Onun nəşi İkinci Fəxri xiyabanda torpağa tapşırılıb. Ölümündən sonra "Vətən uğrunda", "Qarabağ" ordeni, "Füzulinin azad olunmasına görə" və "Xocavəndin azad olunmasına görə" medalları ilə təltif edilib.
