Xəzər rayonu, Binə qəsəbəsinin 5 mərtəbələr adlanan ərazisində sakinlər 20 ilə yaxındır ki, məişət tullantılarını atmağa yer tapmırlar. Məcburiyyətdən yolun kənarına atılan zibillər ərazidə antisanitar vəziyyət yaradıb. Bu haqda ATV Xəbər reportaj təqdim edib.
Ümumilikdə ərazidə qutuların sayı azdır və sakinlərin sayı çox olduğuna görə insanlar məcbur olub öz məişət tullantılarını zibil qutularına yox, yolun hərəkət hissələrinə atırlar. Tullantılar yığılan ərazidə məktəb yerləşdiyindən, gün ərzində xeyli sayda şagird və valideyn bu yoldan istifadə edirlər.
“Biz də gəlib atırıq zibilimizi. Burda qablar var idi, indi bir dənə qalıb. Başqa nə edə bilərik? Hara ata bilərik zibilimizi? İylənir, həftədə bir dəfə maşın gəlir”, - sakinlərdən biri öz fikirlərini bildirib.
Sakinlər deyir ki, məsələ uzun müddət araşdırıldıqdan sonra aidiyyəti qurumlardan əraziyə bir şəxs gəlib. Sakinlər onlara yeni qutuların gətiriləcəyini düşünüblər. Lakin həmin adam onlara zibilləri yolun əks tərəfinə atmağı məsləhət görməklə kifayətlənib. Sakinlər bu vətəndaşın hansı idarəni təmsil etdiyini bilmirlər.
Binə qəsəbəsi bələdiyyəsi, Mənzil kommunal istismar sahəsi və Xəzər Rayon İcra Hakimiyyətinin nümayəndələri bildirib ki, həmin məsələnin onlara aidiyyəti yoxdur.
Sakinlər ümid edirlər ki, hər hansısa bir idarə bu məsələni öz üzərinə götürəcək və problemin həlli üçün hərəkətə keçəcək. Əks halda insanların sağlamlığı risk altında olacaq.
