Xəzər rayonunda təhlükə yaradan lyuk problemi həll olunmur. Bu haqda 5 yanvar tarixində Bakuplus.az-a məlumat daxil olub.
Dekabrın 29-da Şağan qəsəbəsi, 124 nömrəli tam orta məktəbin qabağında nasaz lyuk problemini işıqlandırmışdıq. Məktəbin yanından keçən avtomobil yolunun tən ortasında kanalizasiya quyusunun ağzı düzgün ölçüdə quraşdırılmamışdır. Yolun üstü ilə hərəkət edən avtomobil, qapağı yerindən tərpədirdi və nəticədə quyunun ağzı açıq qalırdı. Bu isə məktəbdə oxuyan şagirdlərə təhlükə yaradırdı.
Bu gün məlumat aldıq ki, nasaz lyuk təmir olunmayıb. Həmin kanalizasiya quyusunun qapağı yığışdırılıb. Hal-hazırda qapaqsız, açıq qalan kanalizasiya quyusu şagirdlərə və yol ilə hərəkət edən avtomobillərə təhlükə saçır. Xüsusilə də axşam saatlarında problem təhlükəli hala çevrilir.
