Azərbaycan Dövlət Film Fondunda xalq artisti Ənvər Həsənovun şəxsi arxivi yaradılıb. Bu barədə bu gün, 8 fevral tarixində Azərtac məlumat verib.
Fonda görkəmli sənətkarın illər ərzində topladığı 700-dən çox fotoşəkil, kinossenariləri, afişa və kinoplakatları, qəzet və jurnalları və digər arxiv sənədləri daxil olub.
Fonda daxil olan arxiv sənədlərini artist özü təhvil verib.
Ənvər Həsənov 17 avqust 1950-ci ildə Bakıda anadan olub, gənc yaşlarından aktyorluğa başlamışdır. Xüsusilə “Yeddi oğul istərəm”də Cəlal, “Dərviş Parisi partladır”da Şahbaz, “Babək”də Tərxan, “Uşaqlığın son gecəsi”ndə Murad və digər maraqlı obrazlar yaratmışdır. O, həyat yoldaşı Mömünət Qurbanova ilə "Dərviş Parisi partladır" və "Atları yəhərləyin" filmlərində rol almışdır. Rejissor kimi Həsənov “Haray, Xocalım, haray”, “Tələ” və Hacı Zeynalabdin Tağıyevdən bəhs edən “Sönməyən çıraq” sənədli filmlərini çəkmişdir.
Azərbaycan kinosunun inkişafındakı xidmətlərinə görə 2000-ci ildə Azərbaycanın Əməkdar artisti, 2018-ci ildə isə Xalq artisti fəxri adlarına layiq görülmüşdür.
