Bu gün Novruz bayramının ilaxır çərşənbələrindən biri - Od çərşənbəsi qeyd olunur. Bu çərşənbənin qeyd olunması qədimdə insanların Günəşə, oda olan inamından irəli gəlir. Qədimdən türk xalqları tonqal qalamaqla şad günlərdə şənliyə, düşmənin hücumu zamanı isə müdafiə olunmağa toplaşmaq üçün işarə verirdilər.
Bu çərşənbədə odun, tonqalın qalanması yazın və istiliyin gəlişinin göstəricisidir. Hər evin və binanın qarşısında tonqalın yandırılması həmin ilin isti, bərəkətli keçməsinə nişandır. Od çərşənbəsində ailə üzvlərinin adına şamlar yandırılır. Bəzi bölgələrdə ölənlərin ruhu üçün bir şam ayrılır.
Tədqiqatçılar qeyd edirlər ki, bəzi bölgələrdə tonqala üzərlik də atar, bununla bədnəzərdən qorunacaqlarına inanardılar. Bu, köhnə Bakının da adətlərindən biri idi. Qadınlar tonqala üzərlik töküb, bu sözləri oxuyardılar:
Üzərliksən, havasan,
Cəmi dərdə davasan.
Hər yerdə sən yanarsan,
Qada-bala apararsan.
Mənbələr:
