Xan hamamı Bakıda, Nardaran qəsəbəsi ərazisində yerləşib. Hamam XIV əsrə aid edilib.
Burada iki kitabə aşkar edilmişdir. Birinci kitabədə “790-cı ilin müqəddəs məhərrəm ayında (yanvar-fevral, 1388-ci il) ustad Güştasf ibn Musa tərəfindən inşa edilib” sözləri həkk olunub. İkincisində isə binanın Xacə Zeynəddinin əmri ilə tikilməsi qeyd edilir. [Известия Азербайджанского Археологического Комитета (выпуск I). Баку-1925]
Ehtimal edilir ki, bu hamam Şirvanşahların yay igamətgahının kompleks tikililəri sırasına daxil olub. Sonradan Bakı xanlarının buranı istirahət məkanı kimi istifadə etməsi nəticəsində bu hamam da “Xan hamamı” adını alıb.
Xan hamamı dəhliz, geyinmə, mərkəzi və ayrı yuyunma otaqları daxil olmaqla yeddi düzbucaqlı otaqdan ibarətdir. Hamam otaqları quruluşuna görə Abşeronun və Azərbaycanın digər ərazilərinə məxsus hamamlardan fərqlənir. Binanın iki günbəzi mövcuddur. Günbəz hamamın işıqlandırılmasını təşkil edib. Tikili saxsı borular vasitəsilə isti və soyuq su ilə təmin edilirdi. Otaqların birində suyun qızdırılması zamanı yaranan isti hava axını daş döşəmələrin altından keçən daş kanallara buraxılırdı. Bu, hamamın otaqlarının və döşəmələrin isidilməsini təşkil edirdi. Hamam hovuzlarına su tikilinin yaxınlığında yerləşən su quyularından qapalı kanallar vasitəsilə gətirilirdi. [Щеблыкин И.П. Памятники Азербайджанского зодчества эпохи Низами. Баку-1943]
Abidə uzun zaman torpaq altında qalmış və yalnız 1913-cü ildə üzə çıxmışdır. O zamanlar bu torpaq sahəsinin sahibi, Bakı xanlarının nəslindən olan Kərbəlayi Hacı Mollaoğlu hamamı təmizləyib yenidən istifadə etmək istəyirdi. Lakin 1914-cü ildə başlamış müharibə təmir işlərinə mane oldu. [Известия Азербайджанского Археологического Комитета (выпуск I). Баку-1925]
Xan hamamı ölkə əhəmiyyətli tarixi abidələr siyahısına daxil olunsa da, hazırda abidə tamamilə dağıdılıb.
