Bu gün, 3 may tarixində Milli Gimnastika Arenasında bədii gimnastika üzrə 27-ci Bakı birinciliyinin ilk yarış gününə start verilib. Bu haqda Bakuplus.az Azərbaycan Gimnastika Federasiyasına istinadən məlumat verir.
Çempionatda doqquz idman klubunu təmsil edən 186 gimnast iştirak edir. Fərdi proqram üzrə keçirilən yarışlarda gimnastlar “balacalar” (2012-2014-cü il təvəllüdlü), “yeniyetmələr” (2010-2011-ci il təvəllüdlü), “gənclər” (2007-2009-cu il təvəllüdlü) yaş kateqoriyalarında çıxış edirlər; qrup şəklində isə "balacalar" (2012-2014-cü il təvəllüdlü) və "yeniyetmələr" (2010-2011-ci il təvəllüdlü) çıxış edir.
Mayın 3-4-də keçiriləcək yarışlarda gimnastlar həm fərdi proqramda, həm də qrup hərəkətlərində çoxnövçülükdə mübarizə aparacaqlar.
Tamaşaçıların Bakıdakı Milli Gimnastika Arenasında yarışları canlı izləmək imkanı var. Yaşı 18-dən az olanlar istisna olmaqla, tamaşaçılarda etibarlı vaksin sertifikatı və ya immunitet sertifikatı olmalıdır.
