Bakı-Şamaxı yolunun Acıdərə adlanan ərazisində 12 iyun, saat 23:00 radələrində ağır yol qəzası baş verib. Bu haqda bu gün, 13 iyun tarixində Bakuplus.az məlumat verir.
Məktəbliləri daşıyan “Bakı-Tovuz-Qazax-Qırmızı Körpü” lövhəli “Mercedes” markalı, 90-NL-949 dövlət nömrə nişanlı sərnişin avtobusu yoldan çıxaraq metal hasara çırpılıb.
Qəbələdən Bakıya gedən avtobusda 55 sərnişindən 13-ü xəsarət alıb. Onlardan 11 nəfər Şamaxıdakı xəstəxanaya, 2 nəfər isə ağır vəziyyətdə Qobustan Rayon Mərkəzi Xəstəxanasına aparılsa da, daha sonra ailələrinin istəyi ilə paytaxtda fəaliyyət göstərən özəl xəstəxanaya yerləşdiriliblər.
Hazırda 10 nəfər, ilkin təcili tibbi yardım alaraq, ambulator müalicə üçün buraxılıb.
Sərnişinlərin Bakının 279 saylı tam orta məktəbinin müəllim və şagirdləri olduğu bildirilir.
Faktla bağlı araşdırma aparılır.
14:25 - Yenilənib
Ağır vəziyyətdə xəstəxanaya yerləşdirilən 3 sərnişinin vəziyyəti məlum olub.
Vəziyyəti ağır olan xəsarət alanlardan biri müxtəlif sınıqlar ilə Bakıdakı tibb müəssisəsinə yerləşdirilib. Yaralı yaxın zamanda əməliyyat olunacaq.
Vəziyyəti orta-ağır olan iki nəfər dövlət tibb müəssisəsinə aparılsa da, daha sonra yaxınlarının və tur təşkilatçılarının xahişi ilə onlar özəl klinikaya köçürülüb. Onlardan birinə bazu sümüyünün orta üçdə birinin yerdəyişmiş sınığı diaqnozu qoyulub. Digər 1 nəfər isə bud sümüyünün dəqiqləşdirilməmiş sınığı diaqnozu ilə paytaxtda yerləşən özəl tibb müəssisəsində müalicəsini davam etdirir.
18:00 - Yenilənib
Şamaxı-Bakı yolunda uşaqların xəsarət alması ilə nəticələnən qəza ilə bağlı onların təhsil aldıqları 279 saylı məktəbin direktoru Südabə Abdullayeva bəzi təfərrüatları açıqlayıb. Onun sözlərinə görə, səyahət həftəsonu təşkil edildiyi üçün o, hadisəni gecə öyrəndi. Səfəri məktəb deyil, valideynlər təşkil etmişdir. Müəllim isə onlar tərəfindən dəvət olunmuşur.
O, həmçinin qeyd edib ki, səfərin təşkilatçısı Empathy Travel turizm şirkəti olub.
