Bakıda əlverişsiz hava şəraiti nəticəsində iki kişi müxtəlif dərəcəli bədən xəsarətləri alıb. Bu haqda bu gün, 21 aprel tarixində Report Səhiyyə Nazirliyinə istinadən məlumat verib.
Qeyd olunur ki, xəsarət alanlar Bakı şəhər Təcili Tibbi Yardımın əməkdaşları tərəfindən xəstəxanaya çatdırılıb.
16:26 - Yenilənib
Yaralanan 2 nəfər təcili tibbi yardımla Kliniki Tibbi Mərkəzə (KTM) gətirilib.
Qaradağ rayon sakini, 34 yaşlı şəxs Sahil qəsəbəsində yerləşən iş yerində olarkən xəsarət alıb. Güclü külək darvazanı onun üzərinə aşırıb. Ona xəstəxanada on ikinci döş, birinci bel fəqərələrinin zədələnməsi diaqnozu qoyulub.
Həmin şəxsə ilkin tibbi yardım göstərilib və bir müddət sonra o, ambulator müalicəyə buraxılıb.
Xəsarət alan digər şəxs, Lökbatan qəsəbə sakini, 60 yaşlı TIR sürücüsünün sözlərinə görə, yük maşınının qapısını açarkən, güclü külək qapını əlindən alıb və o da yıxılaraq xəsarət alıb.
Hadisə nəticəsində kəllə-beyin travması alan şəxs hazırda Mərkəzin Neyrotravma şöbəsinə yerləşdirilib və onun müalicəsi davam etdirilir.
