Bakıda yol kənarındakı ağacın kəsilmə səbəbləri araşdırılıb. Bu haqda 9 fevral tarixində Report məlumat verib.
“Azadlıq Bağçalı evlər” adlı yaşayış kompleksinin hasarlanmış ərazisinin kənarındakı səkidə ağac kəsilib. Məlum olub ki, həmin ərazidə səkidə olan ağaclar ilk olaraq budanıb, daha sonra isə kəsilib.
Sakinlər bu barədə sosial şəbəkələrdə paylaşım edərək, öz narazılıqlarını bildiriblər. Faktla bağlı Dövlət Ekoloji Təhlükəsizlik Xidməti araşdırma aparıb.
"Araşdırma zamanı sözügedən ünvanda bioloji inkişafdan qalmış ağacın güclü külək nəticəsində aşdığı və 53 saylı Mənzil Kommunal İstismar Sahəsinin işçiləri tərəfindən götürüldüyü müəyyən edilib.
Xidmətin əməkdaşlarının nəzarəti altında Bakı şəhər Yaşıllaşdırma Təsərrüfatı Birliyinin işçiləri tərəfindən aşmış ağacın yerinə şərq çinarı ağacı əkilib", - Dövlət Ekoloji Təhlükəsizlik Xidmətinin rəsmisi bildirib.
