Bakıda polis əməkdaşları, keçirdikləri əməliyyat zamanı narkokuryerin silahlı hücumuna məruz qalıblar. Bu haqda BakuPlus.az Kriminalqafqaz.az-a istinadən bu gün, 3 may tarixində xəbər verir.
Baş İdarənin əməkdaşları tərəfindən həyata keçirilən tədbirlər nəticəsində əvvəllər də məhkum edilmiş Vüqar tutulub. Onun əlindəki bağlamaya baxış zamanı ümumilikdə 32 kiloqram narkotik vasitə, o cümlədən 22 kiloqram marixuana, 4 kiloqram heroin, 6 kiloqram psixotrop maddə olan metamfetamin və 1600 ədəd metadon həbi aşkar edilib.
Vüqar Cəfərovla əlbir olan Rövşən Qasımov saxlanılan zaman polis əməkdaşlarına müqavimət göstərərək idarə etdiyi “Opel” markalı avtomobil ilə qaçmağa cəhd göstərib.
Polisə tabe olmayan həmin şəxs üzərində olan odlu silahla polis əməkdaşlarına atəş açıb. Xidməti silahdan havaya xəbərdarlıq atəşi açan polis Rövşən Qasımovdan könüllü təslim olmasını tələb edib.
Tabe olmayan Qasımov xidməti silahdan açılan atəş nəticəsində saxlanılıb. Rövşən Qasımova ilkin tibbi yardım göstərilib və o, xəstəxanaya yerləşdirilib.
Ondan 1 ədəd “Makarov” marakalı tapança, patronlar, patron darağı, 500 qram metamfetamin, narkotik vasitələrin satışı zamanı pul dövriyyəsində istifadə olunan plastik kartlar və elektron tərəzi aşkar edilərək götürülüb.
Faktla bağlı cinayət işi başlanılıb, araşdırmalar davam etdirilir.
