Goranboyda baş verən qətlin təfərrüatları məlum olub. Bu haqda 25 mart tarixində Baş Prokurorluq məlumat verib.
Xalaoğlu və xalaqızı olan 45 yaşlı Mehman Süleymanov və onun yoldaşı, 37 yaşlı Əfsanə Məmmədova birlikdə Bakı şəhərində yaşayırmışlar. Onlar Novruz bayramı ilə əlaqədar Göranboy rayonunun Qızılhaclı kəndinə gəliblər. Burada ər və arvad mübahisə ediblər və Əfsanə Məmmədova küsərək anasının yaşadığı Dəliməmmədli şəhərinə gedib. Bir neçə gündən sonra Mehman Süleymanov mübahisəyə aydınlıq gətirmək üçün qayınanasıgilə gəlib. Lakin barışmaq əvəzinə o, arvadı ilə yenə mübahisə edib və bu zaman qadın küçəyə qaçıb. Həyat yoldaşı isə onun arxasınca idarə etdiyi "Range Rover"-lə gedib. Hisslərini cilovlaya bilməyən Süleymanov Dəliməmmədli şəhərində yerləşən musiqi məktəbinin yaxınlığında öncə qadını avtomobillə vurub, daha sonra maşında gəzdirdiyi mətbəx bıçağı ilə ona bir neçə zərbə endirib.
Qadın xəstəxanaya aparılarkən yolda ölüb. Mərhumun Süleymanov ilə bu evlilikdən 3 övladı var.
Hadisəni törədən Mehman Süleymanov polis tərəfindən saxlanılıb və dindirilən zaman o, törətdiyi əməli etiraf edib. Faktla bağlı rayon prokurorluğunda Cinayət Məcəlləsinin “Qəsdən adam öldürmə” maddəsi ilə cinayət işi başlanıb.
