İrandan Azərbaycana narkotik keçirən şəxslərin məhkəməsi başlayır. Bu haqda 12 fevral tarixində Report məlumat verib.
2021-ci ilin avqust ayında Qaradağ rayonu, Xocasən qəsəbəsi, Xocasən yolunun kənarında yerləşən yanacaqdoldurma məntəqəsinin qarşısında Pərvin Rzayevin idarə etdiyi "Mercedes-Benz S 600" markalı minik avtomobili ilə həmin əraziyə gələn Məhəmməd Məmmədov İrandan Azərbaycana qaçaqmalçılıq yolu ilə gətirilən narkotik vasitəni şərti alıcı qismində çıxış edən gömrük əməkdaşına satarkən saxlanılıb.
M.Məmmədovdan götürülən çantaya baxış keçirilərkən içərisində 9 bağlamada, ümumi təmiz çəkisi 8720,6 qram tiryək aşkar edilib.
Avqustun 4-ü cinayətkar qrupun digər üzvü Süleyman Musazadə Yasamal rayonu ərazisində, P.Rzayev isə bir gün sonra səhər saatlarında Şirvan şəhərində saxlanılıb.
Faktla bağlı cinayət işi başlanılıb və həmin şəxslərin barəsində həbs qətimkan tədbiri seçilib.
