Bu gün Xalq artisti, professional estrada ifaçısı Brilliant Dadaşovanın ad günüdür.
Bakuplus.az məlumat verir ki, Brilliant Dadaşova 1959-cu ilin 15 sentyabrında Bakı şəhərində anadan olub. Onun anası məşhur Azərbaycan qarmon ifaçısı, 1966-cı ildə avtomobil qəzasında həlak olmuş Qızxanım Dadaşovadır.
Brilliant Dadaşovanın musiqi karyerası 1983-cü ildə Eldar Mansurovun mahnıları ilə başlayıb. 1985-ci ildə Brilliant Dadaşova Moskvada keçirilən Ümumdünya Gənclər Festivalında ilk dəfə böyük səhnəyə gəlib. 1986-cı ildə Brilliant Dadaşova və Akif İslamzadə "Hər şey gözəldir həyatda" adlı mahnını yazdırırlar və bu mahnı Azərbaycanda çox məşhur olur. Həmin ildə Dadaşovanın eyni adlı musiqi albomu çıxıb. 1987-ci ildə o, sovet ifaçıları arasında keçirilən müsabiqədə birinci yerə nail ola bilib.
1989-cu ildə Brilliant Dadaşovanın çox məşhur "Bayatılar" adlı mahnısı işıq üzü görür. Qısa müddətdə hitə çevrilən bu mahnı Brilliantdan sonra Sezen Aksu, Edward Maya, Keti Garbi, Reno, Levent Yüksel, Monika Salmaso, "Brazilian girls", "N Dubz", DJ Brizi və Eusebio Belli və başqa dünya ulduzları tərəfindən yüzlərlə versiyada ifa olunub.
Brilliant Dadaşova Azərbaycanı xarici ölkələrdə də uğurla təmsil etməyə başlayıb. Sovet İttifaqı dağıldıqdan sonra Rusiyada solo konsertlə çıxış edən ilk Azərbaycan müğənnisi məhz Brilliant Dadaşova olub. 1994-cü ildə "Sevəcəyəm" adlı musiqi albomu çıxıb. Bu disk həmin illərdə həm Azərbaycanda, həm də Türkiyədə çox uğur qazanıb. 1995-ci ildə "Züleyxa" mahnısına çəkilmiş videoklip Rusiya kanalında nümayiş etdirilməyə başlayıb və kanalın qızıl onluğunda uzun müddət ərzində ön cərgələrdə sabit qalıb. B.Dadaşova 1998-ci ildə "Dərdimdən öləcəksən" adlı albom buraxdırıb.
1997-ci ildə Brilliant Dadaşovaya Azərbaycanın əməkdar artisti adı verilib. Həmin ildə o, bir sıra Azərbaycan müğənnisi və Norveçin SKRUK ansamblı ilə birlikdə "Landet vi kommer fra" Azərbaycan-Norveç layihəsində iştirak edib. 1999-cu ildə Brilliant Dadaşova bələdiyyə seçkilərində qalib gələrək Bakı şəhəri Səbail bələdiyyəsinə üzv seçilib.
2000-ci ildən 2005-ci ilədək o, Azərbaycanın "Space" TV kanalında "Gözəllik dünyanı xilas edəcək" adlı veriliş aparıb. 2008-ci ildə Brilliant Dadaşovanın "Masal Dünyam" adlı musiqi albomu çıxıb. Bu albom Türkiyədə yazılıb və çox uğurlu alınıb. Həmin il Brilliant Dadaşova Azərbaycanın Xalq artisti fəxri adına layiq görülüb.
2021-ci ildə Adriano Celentano ilə birgə "Per Sempre" mahnısı yayımlanıb.
Ailəlidir, bir oğlu var.
