Bu gün Xalq artisti, Dövlət Mükafatı laureatı Yaşar Nurinin anım günüdür.
Bakuplus.az xəbər verir ki, Yaşar Nuri 1951-ci il sentyabrın 3-də Bakıda aktyor Məmmədsadıq Nuriyevin ailəsində dünyaya gəlib.
Uşaqlıqdan aktyorluğa maraq göstərib. Bir dəfə məktəbin pəncərəsini sındırdığı üçün direktor atasını çağırmasını istəyib. Məmmədsadıq Nuriyevi tanıyan direktor Yaşarı bağışlayıb. Aktyor sonralar bu hadisəni belə xatırlayırdı: "Düşündüm ki, mənim kiçik xətamı atama görə keçdilər. Gərək mən də aktyor olam ki, böyüyəndə böyük xətalarımı da özümə görə keçsinlər".
Yaşarın səhnəyə ilk addımı 12 yaşında "Toy kimindir?" tamaşasında olub. Tapdıq rolunun ifaçısı xəstələnəndə tamaşanı əzbər bilən Yaşara həmin obrazı oynamaq təklif olunub. O, rolun öhdəsindən gəlib və ilk dəfə atası ilə eyni səhnəni bölüşüb.
1968-ci ildə 173 nömrəli məktəbi bitirən Yaşar Nuri Azərbaycan Dövlət İncəsənət İnstitutuna daxil olub. 1972-ci ildə institutu bitirib, hərbi xidmətdən sonra 1974-cü ildə Akademik Milli Dram Teatrına qəbul edilib.
Tələbəlik illərində tanınan aktyor anasının seçdiyi qızla ailə qurub. Yaşar Nuri evlilik təklifini yumorla edib: "Vaxt yoxdur ssenari qurmağa, bütün günü səhnədə ssenari ilə oynayıram. Evlənirik. Vəssalam".
Ona şöhrət gətirən "Səni axtarıram" tamaşasında Firəngiz Mütəllimova ilə tərəf-müqabili olub. Aralarında sevgi münasibəti olduğu barədə söz-söhbətlər yayılsa da, həyat yoldaşı Rəhimə xanım Yaşarın Firəngizə meylini hiss etdiyini, lakin münasibət yaşamadıqlarını bildirib.
Yaşar Nurinin arzularından biri Kukla Teatrında Məşədi İbad obrazını oynamaq olub. Aktyor tamaşada cəmi üç dəfə səhnəyə çıxıb. Qızı Ülviyyə sonuncu çıxışdan sonra atasının səhnəyə son dəfə çıxdığını hiss etdiyini və ağladığını xatırlayıb.
20 Yanvar hadisələri aktyora ağır təsir edib. Həmin hadisələrdən sarsılan Yaşar Nurinin saçının arxa hissəsinin xeyli qismi bir gecədə ağarıb.
Xalq artisti uzun sürən xəstəlikdən sonra 22 noyabr 2012-ci ildə, 61 yaşında Mərkəzi Gömrük Hospitalında vəfat edib. Ölümündən üç gün əvvəl qızlarına "Mən öləndən sonra siz neyləyəcəksiniz?" demişdi.