Azərbaycan Uşaq Fondunun sədri Zəhra Bədəlbəyli bildirib ki, noyabrın 20-də Bakıda yerləşən Hökumət Evində fondun istifadə etdiyi iki otaqdakı əşyalar çıxarılıb. Onun sözlərinə görə, qalan iki otağın da noyabrın 23-də, bazar ertəsi boşaldılması nəzərdə tutulur.
Bakuplus.az xəbər verir ki, Bədəlbəyli videomüraciətində əşyaları çıxarmağa gələn şəxslərin Əmlak Komitəsinin əməkdaşları olduğunu deyib. Onun iddiasına görə, həmin şəxslər öz vəzifələrini təsdiq edən hər hansı sənəd təqdim etməyiblər.
"Heç bir sənəd göstərmədən əmlakımızı götürmək və otaqları boşaltmaq istəyirlər", – deyə Bədəlbəyli bildirib.
Fond sədrinin sözlərinə görə, əşyaları əvvəlcə anbara aparmaq istəyiblər. Lakin sonradan onlar fondun istifadəsində qalan digər iki otağa yerləşdirilib. Bədəlbəyli əşyaların bir qismini şəxsi vəsaiti hesabına aldığını da qeyd edib.
O bildirib ki, Azərbaycan Uşaq Fondu 24 ildir Hökumət Evində fəaliyyət göstərir. Fondun əvvəlki binası musiqi kollecinə verildikdən sonra Nazirlər Kabinetinin 26 avqust 2002-ci il tarixli qərarı ilə təşkilata beş otaq ayrılıb. Noyabrın 20-dək fond həmin otaqlardan dördündən istifadə edib. Bədəlbəylinin sözlərinə görə, sözügedən qərar hələ də qüvvədədir.
Sədr əlavə edib ki, fondan əvvəllər də otaqları boşaltmaq tələb olunub. Hazırda təşkilat yalnız kommunal xidmətlərə görə ödəniş edir.
"Kommunal borcumuz var. Onu ödəməkdən imtina etmirik. Vəsaitimiz olanda ödəyəcəyik", – deyə Bədəlbəyli bildirib.
Videomüraciətində Zəhra Bədəlbəyli Prezident İlham Əliyevə və birinci vitse-prezident Mehriban Əliyevaya müraciət edərək məsələyə müdaxilə etmələrini xahiş edib. O, hadisənin Ümumdünya Uşaq Günü ərəfəsində deyil, məhz həmin gün baş verdiyini vurğulayıb.