Abşeron Rayon Mərkəzi Xəstəxanasının Ümumi cərrahiyyə şöbəsində iş intizamı, tibbi geyim qaydaları və rəhbərliyin nəzarəti ilə bağlı vətəndaş narazılıq edib. Şikayət sosial şəbəkədə yayımlanıb, məsələ ilə bağlı TƏBİB araşdırma aparıb.
Bakuplus.az xəbər verir ki, vətəndaş Vüqar Sadıqov sosial şəbəkə hesabında paylaşdığı müraciətində səhiyyə naziri Anar Bayramova və TƏBİB-ə üz tutaraq xəstəxanada müşahidə etdiyi halların araşdırılmasını istəyib.
O, Ümumi cərrahiyyə şöbəsində Oruc adlı həkimi mülki geyimdə gördüyünü bildirib. Şikayətçinin sözlərinə görə, həkim özü ona yaxınlaşaraq qazi olduğunu da qeyd edib. V.Sadıqov qazi statusuna hörmətlə yanaşdığını vurğulasa da, tibbi müəssisədə müəyyən edilmiş qaydaların bütün əməkdaşlara eyni şəkildə tətbiq edilməli olduğunu bildirib.
Vətəndaş, həmçinin şöbə müdirinin tabeliyindəki əməkdaşlara nəzarətindən, Keyfiyyətə Nəzarət xidmətinin fəaliyyətindən və baş həkimin xəstələrin vəziyyəti ilə maraqlanmasından narazılığını ifadə edib. O, xəstəxanada iş intizamının və nəzarət mexanizmlərinin yoxlanılmasını tələb edib.
Bakuplus.az-ın sorğusuna cavab olaraq TƏBİB-dən bildirilib ki, Abşeron RMX-nin Ümumi cərrahiyyə şöbəsinin fəaliyyəti ilə bağlı daxil olmuş müraciətə müvafiq qaydada baxılıb.
Aparılmış araşdırma zamanı müəyyən edilib ki, ümumi cərrah Oruc Şəfiyevlə qarşılaşma onun işə yeni gəldiyi və tibbi geyimini dəyişməzdən əvvəlki vaxtda baş verib. Bu səbəbdən sözügedən halın əmək intizamının və tibbi geyim qaydalarının pozulması kimi qiymətləndirilməsi üçün əsas müəyyən edilməyib. Eyni zamanda, həkimin iş fəaliyyəti, o cümlədən müayinə və əməliyyatlar zamanı müvafiq tibbi geyimdən istifadə etdiyi təsdiqlənib.
Müraciətdə əksini tapan digər məsələlər də araşdırılıb, əmək intizamı, sanitariya-gigiyena və infeksion təhlükəsizlik tələblərinin pozulması halları aşkar edilməyib.
Bununla yanaşı, tibbi geyim qaydalarına riayət olunmasına nəzarətin daha da gücləndirilməsi məqsədilə xəstəxana rəhbərliyinə müvafiq tövsiyələr verilib.