Azərbaycan Mədəniyyət Nazirliyinin mətbuat xidmətindən verilən məlumata görə, noyabrın 15-də Qobustan Milli Tarix-Bədii Qoruğunda “Yurdda bayramı” adlı festival keçirilib. Festival tərəkəmə tayfaların zəngin etnik mədəniyyətini təbliğ etmək, onların həyat tərzini ictimaiyyətə çatdırmaq məqsədilə təşkil olunub.
Festivalda Azərbaycanın mədəniyyət naziri Anar Kərimov, Dövlət Turizm Agentliyinin sədri Fuad Nağıyev, Vətən müharibəsi qaziləri və digər ictimaiyyət nümayəndələri iştirak edirdilər. Açılışda çıxış edən Anar Kərimov belə tədbirlərin keçirilməsi ənənəsinin gələcəkdə də davam etdiriləcəyini qeyd edib.
Festival “Yurd” musiqili kompozisiyasının ifası ilə başlayıb. Həmçinin bayramda xalçaçılıq, zərgərlik məmulatları, tərəkəmələrin məişətini və təsərrüfatını əks etdirən nümunələr, milli geyimlər sərgisi təşkil olunub. Xeyriyyə sərgisi ilə paralel olaraq Daun sindromlu uşaqların əl işlərindən ibarət sərgi də keçirilib.
Uşaqlar üçün təşkil olunmuş "Oxatma meydançası" və tərəkəmələrin maldarlıq təsərrüfatına aid heyvanlardan ibarət təmaslı mini zooparkla tanışlıq təşkil edilib.
Daha sonra qonaqlar festival meydanında qurulmuş çadırlarda tərəkəmə xörəklərin dadına baxıblar.
Əsas məşğuliyyəti maldarlıq olan tərəkəmə tayfaları yazın sonu və yayın əvvəlində yaylaqlara, payızda isə qışlaqlara köçürlər. Qoruğun ərazisində və ətrafındakı qədim qışlaqlar çobanların təxminən 5000 illik həyat tərzini əks etdirir. Qobustanda aparılan araşdırmalar da göstərir ki, Qobustandakı qayaüstü rəsmlər Tunc dövründən belə qışlaqlarda yaşayan insanlar tərəfindən yaradılmışdır.
[URIS id=14502]
