Bakıda övladlarını Bədən Tərbiyəsi və İdman Akademiyasının qabiliyyət imtahanından keçirmək istəyən valideynlərə dələduzluq edilib.
Lent.az xəbər verir ki, Sabunçu rayonu Balaxanı qəsəbəsində futbol stadionunu icarəyə götürüb məşqçi kimi dərslər keçən 34 yaşlı İsmayıl Qulamov (soyad şərtidir) iki nəfər oğlanı adı çəkilən akademiyanın qabiliyyət imtahanından keçirəcəyinə söz verib. Bu məqsədlə onların birindən 4500, digərindən isə 4000 manat alıb.
Lakin verdiyi sözü yerinə yetirməyib və zərərçəkənləri aldadıb. Valideynlərin polisə müraciətindən sonra İsmayıl saxlanılıb və barəsində Cinayət Məcəlləsinin 178.2.2-ci (dələduzluq təkrar törədildikdə) maddəsilə cinayət işi açılıb.
Sabunçu rayon Məhkəməsində keçirilən proses zamanı İsmayıl Qulamov barəsində 1 il 11 ay 26 gün müddətinə azadlığın məhdudlaşdırılması cəzası təyin edilib.
