Bakının bəzi ərazilərində – xüsusilə Suraxanı rayonu, Bakıxanov, Yeni Günəşli, Əmircan, Xırdalan və Masazırda günlərlə su fasilələrlə, həm də çox qısa müddətə verilir. İşıq problemi isə başqa bir dərddir. Qurumlar bu vəziyyəti yüklənmə ilə izah edirlər.
Amma sual yaranır: Bakı sanki ilk dəfədir yay görür? Hər il yay isti keçir, bu il isə yay başlamamışdan hava sərin idi. Son 1 aydır havalar isinir və elə həmin günlərdən demək olar ki, problemlər başlayır.
Axı hazırda məzuniyyət mövsümüdür. Bir çox insan rayonlardadır, şəhərdə tıxaclar azalıb. Belə olan halda hansı yüklənmədən söhbət gedir?
Sakinlərə isə qanunsuz tikililər çoxalıb, havalar isinib, suya tələbat da artıb, ona görə də sizin suyunuzu və işığınızı fasilələrlə veririk deyilir. Bəs bu tikililərə kim icazə verib? İcra orqanları, yoxsa bələdiyyələr?
Bizi bu vəziyyətə gətirənlər kimlərdir və cavabdeh kim olacaq? Paytaxt sakinləri də haqlı olaraq əsəbidir və problemlərinin həllini tələb edirlər.
Əgər problem doğrudan da yüklənmədədirsə, bəs bu illərlə planlaşdırılan, milyonlar ayrılan infrastruktur layihələri niyə nəticə vermir?
