Bakının Suraxanı rayonunda 30 yaşlı kişi tanışını bıçaqlamaqda ittiham olunub.
Hadisə H. Əliyev prospektində yerləşən "Ağ çiçəyim" gül mağazasının yaxınlığında baş verib.
İstintaq sənədlərinə görə, Füzuli rayon sakini, 1996-cı il təvəllüdlü Ərəstun əvvəllər tikintidə birlikdə işlədiyi Zəfərdən 170 manat pulunu tələb edib. Pulun verilməməsi səbəbindən aralarında mübahisə yaranıb.
Ərəstun ifadəsində bildirib ki, Zəfər ona qeyrət söyüşü söyüb və buna görə onu görüşə çağırıb. Görüş zamanı mübahisə davaya çevrilib. O, özünü müdafiə etmək məqsədilə götürdüyü meyvə bıçağı ilə Zəfərə bir neçə zərbə vurduğunu deyib.
Ərəstun məhkəmədə özünü qismən təqsirli bilib və törətdiyi əmələ görə peşman olduğunu bildirib.
Bakı Ağır Cinayətlər Məhkəməsinin hökmü ilə o, 5 il müddətə azadlıqdan məhrum edilib.
Zərərçəkmiş şəxs isə ona dəymiş maddi və mənəvi zərərə görə 9110 manat tələb edib. Məhkəmə iddianı qismən təmin edərək Ərəstundan 2110 manat tutulmasına qərar verib.
Ərəstun hökmdən apellyasiya şikayəti verərək cəzasının yüngülləşdirilməsini istəyib. Bakı Apellyasiya Məhkəməsi şikayəti təmin etməyib.
mənbə: demokrat.az
