Bakıda başqasının evinə girib qışqır-bağır salan şəxs həbs olunub.
Lent.az-ın məlumatına görə, hadisə Sabunçu rayonu ərazisində qeydə alınıb.
47 yaşlı şəxs evlərdən birinin həyətinə daxil olaraq "bu ev mənimdir" deyib və səs-küy salıb. Qorxuya düşən ev sahibi bu barədə polisə məlumat verib. Nəticədə həmin şəxs saxlanılaraq, 13-cü Polis Şöbəsinə aparılıb. Məlumata görə, saxlanılan şəxs burada da sakit dayanmayıb və polisin qanuni tələbinə məhəl qoymayıb.
Şöbədə onun barəsində tərtib olunan protokollar baxılması üçün məhkəməyə göndərilib. İşin maraqlı tərəflərindən biri də məhkəmədə yaşanıb. Belə ki, barəsində inzibati xəta üzrə icraat aparılan şəxs məhkəmə zalında özünü normal aparmayaraq çölə çıxıb və özünü də tanımadığını deyərək ifadə verməkdən imtina edib.
Məhkəmənin qərarı ilə həmin şəxs 15 gün müddətinə həbs edilib.
