Bakının Pirallahı rayonunda dərman istehsalı zavodunun açılışı olub. Bu haqda bu gün, 15 avqust tarixində Bakuplus.az Prezidentin rəsmi saytına istinadən xəbər verir.
Azərbaycan Respublikasının Prezidenti İlham Əliyev Bakının Pirallahı rayonunda “Diamed” dərman istehsalı zavodunun açılışında iştirak edib.
İqtisadiyyat naziri Mikayıl Cabbarov və “Diamed Development Group” MMC-nin təsisçisi Aytən Quliyeva dövlət başçısına görülən işlər barədə məlumat veriblər.
Zavodda müxtəlif adlarda, geniş çeşiddə (NaCl 0,9 faiz; Ringer; Ringer laktat; Qlükoza və s.) və müxtəlif həcmlərdə həyati vacib və zəruri venadaxili dərman məhsulları istehsal olunacaq.
Burada 100 iş yeri açılıb. Müəssisənin layihəsi İsveçrə şirkəti tərəfindən, istehsal xətti isə Avropa Farmakopeyasına uyğun olaraq hazırlanıb. Yüksək texnologiya və tam qapalı sistemlə təchiz edilmiş zavodun istehsal avadanlıqları İtaliya, ABŞ, Almaniya, İsrail kimi ölkələrdən alınıb. İstehsal olunan məhsullar zavoda məxsus müasir laboratoriyada Avropa Farmakopeyasının tələblərinə uyğun mütəmadi olaraq yoxlanılır.
1 hektar ərazisi olan zavod 3 min kvadratmetr qapalı sahədən ibarətdir.
Pirallahı Sənaye Parkı 2016-ci ildə layihələndirilib. Bu günədək Parkda 6 müəssisə qeydiyyatdan keçib. Onlardan “R-Pharm” MMC və “Diamed Co” MMC artıq fəaliyyətə başlayıb. Müəssisələr tərəfindən 36,6 milyon manatdan çox investisiya yatırılıb, 130-dan çox iş yeri yaradılıb. Növbəti mərhələdə 30 milyon manat investisiyanın qoyulması və daha 250-dən artıq iş yerinin yaradılması planlaşdırılır.
[caption id="attachment_109537" align="alignnone" width="640"]
Foto president.az[/caption]
