"Geyimlərimin hamısı özümdə qalır. Paltarımı nə hədiyyə edirəm, nə də satıram. Satmaq mənlik deyil. Hər bir geyimim mənim üçün xatirədir. Bir dəfə geyinsəm belə, onu saxlayıram. Həm də sıradan geyimlər geyinmirəm".
Bu sözləri Xalq artisti Aygün Kazımova müsahibəsində deyib.
Səhnəyə çıxmağın onun üçün xüsusi hazırlıq tələb etdiyini bildirən Kazımova alış-verişə olan sevgisindən də danışıb: "Mən mağazaya getmirəm, mağaza bizə gəlir. Çox alış-veriş edirəm. Bu, həm qadınlığımdan, həm də sənətimə olan sevgidən irəli gəlir. Aldığım geyimlərin hamısını da saxlayıram".
Xalq artisti günə necə başladığını da açıqlayıb: "Səhərlər çox erkən oyanıram. Axşam çıxışım yoxdursa, tez yatıram. Günə isti su və zeytun yağı ilə başlayıram, sonra qəhvəmi içirəm. Ardınca idman edirəm. Yay aylarında dəniz kənarına gedir, günəş vannası qəbul edib gəzintiyə çıxıram. Sonra evə qayıdıb yemək yeyirəm, bir qədər dincəlirəm və günün ən maraqlı hissəsi başlayır: bu gün nə geyinəcəyimi düşünürəm".
"Güclü qadın olmaq sizin üçün nə deməkdir" sualını isə A.Kazımova belə cavablandırıb: "Güclü qadın olmaq Aygün Kazımova deməkdir. Qadını cazibədar edən onun təmkinli və hövsələli olmasıdır".
Kazımova görünüşündəki dəyişiklik və plastik əməliyyatlarla bağlı sualı da cavablandırıb: "Əsas məsələ insanın enerjisidir. Təkcə plastik əməliyyatla heç nə həll olunmur. Hər şey kompleks şəkildə edilməlidir. Sevindirici haldır ki, xanımlarımız artıq peşəkar həkimlərə müraciət edirlər. Mənim də həkimlərim hər zaman öz sahələrinin ən yaxşıları olublar".
Mənbə: axsam.аz
