Xətai rayon sakinləri yol qıraqlarında fəaliyyət göstərən ət satışı məntəqələrindən narazıdırlar.
Bakuplus.az-a danışan sakinlər bildirirlər ki, heyvanların kəsilməsi prosesi yol kənarında, avtobus dayanacaqlarının yaxınlığında həyata keçirilir, bu isə həm antisanitar şərait yaradır, həm də insanların, xüsusilə uşaqların psixologiyasına mənfi təsir göstərir.
Qeyd edək ki, Azərbaycan Respublikasının Qida Təhlükəsizliyi Agentliyinin Kollegiyasının “Heyvan və quş kəsimi məntəqələrinə dair baytarlıq-sanitariya normaları və qaydaları”na əsasən kəsim məntəqələrinin ərazisi ən az 1,5 m hündürlükdə hasarla hasarlanaraq, digər ərazilərdən ayrılmalıdır. Kəsim məntəqəsinin yaxınlığında tullantıların toplanması üçün qapaqlı konteynerlər və həmin konteynerlərin yerləşdirilməsi üçün sahə (meydan) ayrılmalıdır. Qaydalarda qeyd edilib ki, kəsim məntəqələri avtomobil yollarından - 30 metr, ictimai təyinatlı və ya ümumi istifadədə olan obyektlərdən, o cümlədən yaşayış binalarından - 300 metr məsafədə olmalıdır.
Sakinlər iddia edirlər ki, Xətai rayonunda ət satışı məntəqələrində bu qaydalara əksərən əməl olunmur və onlara “gözün üstə qaşın var” deyən yoxdur.
