Qızılın qiymətindəki artım dünya bazarlarında müxtəlif amillərin təsiri ilə davam edir. Fevral ayının sonunda bir qədər səngiyən qiymət artımı yenidən sürətlənib. Bu artımın sürətlənməsi qlobal iqtisadiyyatın vəziyyəti, inflyasiya gözləntiləri və investisiya tələbinin artması ilə əlaqədar ola bilər. Xüsusilə, faiz dərəcələrinin dəyişməsi və geopolitik risklər qızılın qiymətinə təsir edən əsas amillərdən biridir.
Bəs qızılın bahalaşmasının əsl səbəbi nədir?
Mövzu ilə bağlı Bakuplus.az-a açıqlama verən iqtisadçı Emin Qəriblinin sözlərinə görə, maliyyə institutlarının proqnozlarına əsasən qızılın qiyməti bu ilin sonuna qədər artacaq:
“Qızılın qiymətinin artmasının səbəbləri çoxdur. Maliyyə bazarlarına diqqət etsək görərik ki, qeyri-stabillikdir. Ona görə də investorlar daha çox qızıla müraciət etməyə başlayırlar. Maliyyə alətlərinin qiyməti dəyişir. Ona görə də maliyyə alətlərindən çıxardıb, qızıla müraciət edirlər.
Mərkəzi banklar külli miqdarda qızıl alır. Nəticədə tələbat və qiymətlər artır. Maliyyə institutlarının proqnozlarına görə, bu ilin sonuna qədər qiymət artacaqdır. Dünya bazarlarının konyunkturasından çox şey asılıdır. Dünya iqtisadiyyatının artım templəri də azalıb. Artsa, maliyyə bazarlarında canlanma yaşansa, qızılın qiymətində stabillik olar”.
İqtisadçı-ekspert Xalid Kərimli isə qeyd edib ki, son beş gündə qiymət 3,8 faiz artıb:
“Son bir ayda 4 faiz, son altı ayda isə 18 faiz artım qeydə alınıb. İlin əvvəlindən qiymət 17 faiz, son bir ildə 40 faiz üzərində artıb. Son beş ildə isə 106 faiz artım müşahidə olunub. Kim son beş ildə qızıla investisiya qoymuşdusa, 106 faiz qazanc əldə edib. 5 günün artımı - 3,8 faiz fantastik rəqəmdir.
Dünya iqtisadiyyatı ilə bağlı qeyri-müəyyənlik qalıb. Eyni zamanda artım inflyasiya ilə də bağlıdır. Qızıl qeyri-müəyyənlikdə həmişə təhlükəsiz faktor hesab olunur”.
“İkinci səbəb uzunmüddətli səbəbdir. Pandemiyadan sonra inflyasiya kəskin artdı. Rusiya ilə Ukraynanın qarşılıqlı sanksiyaları da qızıla marağı çoxaltdı. Rusiya, Braziliya, Çin, Hindistan, Türkiyə, Azərbaycan qızıl ehtiyatlarını artırıb. Son bir ildə 44 ton qızıl alınıb. Və bu proses davam edir. Bu da siyasi-hərbi qeyri-müəyyənlikdir.
Üçüncü səbəb inflyasiyanın aşağı düşməsi nəticəsində FED-in faiz siyasətini aşağı salacağına dair gözləntilərdir”, - deyə X.Kərimli əlavə edib.
Nəzrin Vahid
