Bu gün ölməz komandir Allahverdi Bağırovun doğum günüdür.
Bakuplus.az xatırladır ki, o, 1946-cı il 22 aprel tarixində Ağdamda doğulub.
Ağdamda "Qarabağ" klubunun şərəfini qoruyub,1976-cı ildə baş məşqçi təyin olunub. Müharibə başlarkən Ağdam Xalq Cəbhəsinin sədri seçilib və müstəqil Azərbaycan bayrağını ilk dəfə Ağdama Allahverdi Bağırov sancıb.
1992-ci ilin yanvarında komandirlik etdiyi tabor Naxçıvanlı kəndində düşmənin canlı qüvvəsini məhv edib,150 nəfərlik dəstə ilə Əsgəran qalasınadək irəliləyib. Pircamal kəndindəki bütün yüksəklikləri tutub, Kətük kəndiylə üzbəüz mövqelər qurulub. Əməliyyatlar başa çatdıqdan sonra düşmənin bayraqlarını söküb Azərbaycan bayraqlarını sancmağa onlara 2 saat bəs edib…
Bu əməliyyata görə qəhrəmanımız General Məhəmməd Əsədov adına mükafata layiq görülüb. 2015-ci ildə Qarabağ qazisi Bakir Behbudovun verdiyi müsahibəsində Allahverdi Bağırovun necə biri olmasını təsvir edib:
"O, yeganə komandir idi ki, qabaqda gedirdi. Çox ciddi, tələbkar adam idi. Bir dəfə kəndi alanda dedi ki, birdən kimsə kənddə əhalini qarət edə, doğma oğlum da olsa, güllələyəcəm. Biz oğurluğa getmirik, torpaq almağa gedirik".
Onun ən böyük uğuru 1992-ci ilin iyulunda Aranzəmin döyüşündə olub. Döyüş zamanı onun dəstəsi 100 nəfər ermənini məhv etdikdən sonra 10-nu əsir götürüblər. Həmin əsirlər şəhidlərimizin cansız bədənləri ilə dəyişdirilib.
Bu əməliyyatlar zamanı Ağdam şəhəri 300-ə yaxın şəhid verib.
Allahverdi Bağırov 3 gün ərzində əsirlikdə olan 1003 Xocalı sakinini düşmənin əlindən xilas edib.
1992-ci il 12 iyulda Ağdama təcili qayıdarkən maşında minaya düşüb. Ona əvvəlcədən Şəhidlər Xiyabanında yer ayrılsa da, müəyyən səbəblərdən qardaşı Eldar Bağırovun yanında — Ağdam rayon Şəhidlər xiyabanında dəfn edilib. Allahverdi Bağırov üçün qazılan qəbirdə isə ondan bir gün sonra həlak olan Azərbaycanın Milli Qəhrəmanı Çingiz Mustafayev torpağa tapşırılıb.
Futbolçu Elşad Xudatov müsahibələrinin birində komandirin ruhunun onlar üçün ölümdən də dəyərli olduğunu göstərib:
"Allahverdi Bağırov döyüşdə həlak olanda hamımızı ağlamaq tutmuşdu. Oyunların birinin start fitindən sonra onun ruhunu bir dəqiqəlik sükutla yad edərkən "qrad" atdılar. Mərmi stadiona düşdü. İnanın, futbolçulardan heç biri yerindən tərpənmədi..."
A.Bağırovun Ağdamın Quzanlı kəndində büstü qoyulub.
1993-cü il fevralın 24-də Azərbaycanın Milli Qəhrəmanı adına layiq görülüb.
2014-cü il fevralın 25-də Bakının Binəqədi rayonunda Biləcəri qəsəbəsində istifadəyə verilmiş Milli Qəhrəmanlar parkında büstü ucaldılıb.
