Bakının Xətai rayonunda, Nəcəfqulu Rəfiyev küçəsi 29 ünvanında yaşayan sakinlər səkinin dağıdılaraq qanunsuz parkinqə çevrilməsindən şikayətçidirlər.
Bakuplus.az xəbər verir ki, sakinlərin sözlərinə görə, yeni tikilmiş binanın qarşısında fəaliyyət göstərən obyekt tərəfindən piyadaların hərəkət zolağı məhv edilir:
"Səki maşın dayanacağına çevrilib. Bu isə insanların hərəkətinə ciddi mane olur. Xüsusilə yaşlıların və uşaq arabası ilə gedən valideynlərin yolu keçməsi çətinləşir. Biz məsələ ilə bağlı dəfələrlə aidiyyəti qurumlara zəng etmişik, amma heç bir tədbir görülməyib. Onlar səki əvəzinə yol salmaq istəyirlər", – şikayətçilər bildirib.
Sakinlər məsələ ilə bağlı aidiyyəti qurumların təcili tədbir görməsini tələb edirlər.
