Bakının Qaraçuxur qəsəbəsində fəaliyyət göstərdiyi bildirilən limonad sexində ciddi qanun pozuntuların olduğu iddiası irəli sürülüb.
Bakuplus.az-ın məlumatına görə, bununla bağlı sosial şəbəkələrdə paylaşım edilib.
İddialara görə, sexdə istehsal prosesində istifadə edilən şüşə butulkalar müxtəlif şadlıq saraylarının zibilliklərindən toplanır. Həmin butulkaların isə heç bir sanitar norma gözlənilmədən, adi vannalarda yuyularaq yenidən istehsalata buraxıldığı bildirilir. Bu isə məhsulun gigiyenik təhlükəsizliyi ilə bağlı ciddi suallar yaradır.
Bildirilir ki, müəssisədə antisanitariya şəraiti açıq şəkildə müşahidə olunur. Başqa bir iddiaya görə, burada çalışan işçilərin əmək hüquqları kobud şəkildə pozulur. Belə ki, işçilərlə heç bir rəsmi əmək müqaviləsi bağlanılmadan işə cəlb olunur.
Paylaşımda bildirilir ki, işçilərin əksəriyyəti 50 yaşdan yuxarı, iş tapmaqda çətinlik çəkən şəxslərdir və onlara qarşı qeyri-insani münasibət göstərilir, əməkhaqları isə vaxtında ödənilmir. İddialara əsasən, maaş tələb edən işçilərə "məhsul satılmayıb, pul yoxdur" kimi bəhanələrlə rədd cavabı verilir.
Qeyd olunur ki, məsələ ilə bağlı aidiyyəti qurumlara, o cümlədən Azərbaycan Qida Təhlükəsizliyi Agentliyi (AQTA) müraciətlər edilsə də, indiyədək hər hansı ciddi tədbir görülməyib.
Məsələ ilə bağlı Bakuplus.az saytının əməkdaşı AQTA-ya sorğu ünvanlayıb.
