Xəzər Rayon Məhkəməsində qəsdən sağlamlığa az ağır zərər vurmada təqsirləndirilən Pəri Kərimovanın cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, sonuncu keçirilən prosesdə hökm oxunub.
İttihama görə, 2025-ci il noyabrın 9-da saat 13:00 radələrində Pəri Kərimova yaşadığı Xəzər rayonu ərazisində yerləşən evdə əri, zərərçəkmiş Mayis Kərimovla ailə-məişət münaqişəsi zəminində mübahisə edib.
Mübahisə zamanı qadın belin tiyəsi ilə ərinin burun, qol və ayaq nahiyələrinə qəsdən zərbələr endirib. Nəticədə zərərçəkmiş şəxsə burunun əzilmiş yarası və sağ said nahiyəsinin qançırı kimi sağlamlığın qısa müddətə pozulmasına səbəb olan, yüngül dərəcəli sağlamlığa zərərvurmaya aid bədən xəsarətləri yetirilib.
Məhkəmənin hökmü ilə "Konstitusiya və Suverenlik İli" münasibətilə amnistiya elan edilməsi haqqında" Milli Məclisin Qərarının müvafiq bəndlərinə əsasən təqsirləndirilən şəxs barəsində cinayət təqibinə xitam verilib.
