Ali Məhkəmədə özünü öldürmə həddinə çatdırma, dələduzluq və hədə-qorxu ilə tələb etmədə təqsirləndirilən Səbuhi Heydərovun barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, 6 yanvar 2021-ci il tarixdə iş adamı Vaqif Hacıyev sahibi olduğu şirkətdə sahə rəisi işləyən 1972-ci il təvəllüdlü Səbuhi Heydərovdan hüquq-mühafizə orqanlarına şikayət edib, bir neçə gün sonra isə özünü öldürüb.
Vaqif Hacıyev izolyasiya materialları biznesi ilə məşğul olurmuş, tikinti sahəsində tanınmış iş adamı imiş. O, bir neçə il əvvəl Ceyranbatan qəsəbəsində tanışından iki ev alıbmış. Lakin ev sahibinin oğlu Mahir (şərti) adlı şəxs həmin mənzilləri sonradan öz adına keçirdiyindən biznesmenin verdiyi pullar batıb. Bunu öyrənən Səbuhi işlədiyi şirkətin rəhbərinə Mahiri cəzalandırmağı, onun həbsini təşkil etməyi təklif edib. O deyib ki, əvvəllər bir neçə ay həbsxanada olub, tanışları vasitəsilə Mahirin avtomobilinə narkotik yerləşdirə, sonra polisə məlumat verə, Mahirin həbsinə nail ola bilər. Vaqif Hacıyev bu təkliflə razılaşıb və bu işə görə Səbuhiyə 19 min manat verib.
Bundan sonra Səbuhi Vaqif Hacıyevi inandırıb ki, Mahir bu işdə onun əlinin olduğunu öyrənib, eyni zamanda işə qoşduğu şəxslərin ələ keçmək riski var. Bütün bunları bəhanə gətirən Səbuhi biznesmendən pul tələb etməyə başlayıb. O, Vaqifə deyib ki, bu pulları versə, biznesmenin adı heç yerdə çəkilməyəcək, iş ört-basdır ediləcək. Sonradan Səbuhi Vaqifin cinayət məsuliyyətinə cəlb olunacağına dair yalanlar söyləyib, onun barəsində müxtəlif rüsvayedici məlumatlar yaymaqla hədələyib. Nəticədə o, biznesmenin ümumilikdə 646 195 manat məbləğində pulunu ələ keçirib. Bütün baş verənlərə görə Vaqif Hacıyevdə reaktiv depressiv hal yaranıb. 2 yanvar 2021-ci il tarixdə isə Sübhi növbəti dəfə Vaqif Hacıyevin Nəsimi rayonundakı ofisindən pul alıb çıxarkən tutulub. Bundan sonra Vaqif Hacıyev özünün də rüsvay olacağını düşünərək 6 yanvar 2021-ci il tarixdə saat 12 radələrində bağ evində özünü asaraq intihar edib.
Bakı Ağır Cinayətlər Məhkəməsinin hökmü ilə iş adamını intihara sövq edən, ona qarşı dələduzluq edən və hədə-qorxu yolu ilə 650 min manata yaxın pul almış şəxsə 15 il həbs cəzası verilib. Hökmdən apellyasiya şikayəti verilsə də, təmin edilməyib.
