Kraliça II Elizabetin vəfatı ilə əlaqədar Böyük Britaniyanın Azərbaycandakı səfirliyində bayraqlar endirilib. Bu haqda bu gün, Böyük Britaniyanın Azərbaycandakı səfiri Ferqus Ould öz Twitter səhifəsində bildirib.
Həmçinin Böyük Britaniyanın Azərbaycandakı səfirliyinin müvəqqəti işlər vəkili Filip Barklinin Azərbaycan dilində çıxışı diplomatik nümayəndəliyin Facebook səhifəsində yerləşdirilib. O qeyd edib ki, kraliça bütün həyatını xalqına fədakar xidmətə həsr edib. “Bu itkini dünyada bir çox insan hiss edəcək”, - deyə Barkli əlavə edib.
Eləcə də kraliçanın vəfatı ilə bağlı qeyd buraxmaq istəyənlər üçün diplomatik nümayəndəlikdə matəm kitabı açılıb. Dünyanın hər yerindən insanlar onlayn olaraq açıq olan yas kitabında kraliçanın ölümü ilə bağlı başsağlığı verə bilərlər.
8 sentyabr 2022-ci il tarixində Böyük Britaniya kraliçası II Elizabet 96 yaşında vəfat edib. O, ölkəni 70 il idarə etmişdir. Ölümündən sonra kraliçanın böyük oğlu və varisi, keçmiş Uels şahzadəsi Çarlz Birləşmiş Krallığın kralı təyin olunacaq. Kraliça II Elizabet Britaniya tarixində ən uzun müddət hakimiyyətdə olan monarx idi.
