Paytaxtın Xətai rayonu, Babək prospektinin İlham Məmmədov küçəsi ilə kəsişməsində yaşayan minlərlə sakin avtobus dayanacağının olmamasından şikayət edirlər. Bu haqda bu gün, 8 dekabr tarixində Bakuplus.az Real TV-yə istinadən xəbər verir.
2 il öncə prospektdə aparılan təmir-bərpa işləri zamanı dayanacağın yeri dəyişdirilib. Nəticədə 2000-3000 insanın yaşadığı ərazi dayanacaqsız qalıb. Avtobusa minmək üçün sakinlər 600-700 m piyada getməyə məcbur olurlar. Onların sözlərinə görə, dayanacağın olduğu yerdə, demək olar ki, yaşayış yoxdur.
“Çox əziyyət çəkirik. Ağır çantalarla 600 m yol qət etməliyik. Yaşlı adamlarıq”, - deyə sakinlər şikayət edirlər.
Həmçinin onlar piyada keçidinin olmamasından da narazıdırlar.
Bakı Nəqliyyat Agentliyindən məsələ ilə bağlı bildirilib ki, avtobus dayanacaqları qanuna uyğun yerləşdirilib, ancaq həmin ərazidə piyada keçidinə tələb var. Yaxın zamanlarda keçidin təşkili həyata keçiriləcək.
