Kimyəvi təmizləməyə verilən gödəkçənin yararsız vəziyyətə düşməsi mübahisəyə səbəb olub.
Vətəndaş Arzu Paşazadə Bakuplus.az-a müraciət edərək bildirib ki, oktyabr ayının 5-də "EuroClean" Quru Təmizləmə Mərkəzinə gödəkçəsini kimyəvi təmizləməyə təhvil verib. Lakin iddiaya görə, təmizləmə prosesindən sonra geyim əvvəlki vəziyyətini itirib və yararsız hala düşüb. Vətəndaş deyir ki, gödəkçənin kimyəvi təmizlənmədən sonra rəngi və teksturası zərər görüb. Bundan sonra qadın etirazını bildirsə də, ondan üzr də istəməyiblər.
Məsələ ilə bağlı "EuroClean" şirkəti ilə əlaqə saxladıq. Özünü qurumun direktoru kimi təqdim edən Bayandur Süleymanlı Bakuplus.az-a bildirildi ki, sözügedən gödəkçəni Arzu Paşazadə adlı vətəndaş kimyəvi təmizləməyə təhvil vermədən öncə o, sənəd imzalayıb. Sənəddə də qeyd edilib ki, təhvil zamanı müştəriyə mümkün risklər barədə əvvəlcədən məlumat verilib. Qadın da bu şərtlərlə razılaşıb və müvafiq sənədə imza atıb. Əlavə olaraq da bildirilib ki, qadın 330 manatlıq gödəkçə üçün 500 manat təzminat tələb edib
Arzu Paşazadə isə iddia edir ki, o, 500 manat pul tələb etməyib.
Məsələ ilə bağlı, Antiinhisar və İstehlak Bazarına Nəzarət Dövlət Agentliyinə də sorğu ünvanlanıb.
