Bu gün tanınmış satirik şair Baba Pünhanın doğum günüdür.
Bakuplus.az xatırladır ki, Baba Pünhan 1948-ci il noyabrın 5-də Bakı şəhərinin Kürdəxanı qəsəbəsində anadan olub.
O, 1955-ci ildə 99 saylı məktəbin birinci sinfinə başlayıb. 1963-cü ildə Bakı Rabitə Texnikumuna daxil olub, 1967-ci ildə təhsilini başa vurduqdan sonra Bakı Metropolitenində mexanik kimi işləməyə başlayıb. Həyatının 25 ilini metroda keçirən şair bu illəri xatırlayarkən "yerin altını da bilirəm, üstünü də" deyirdi.
Metroda işlədiyi ilk vaxtlarda "Metro" qəzetində kiçik həcmli şerləri və qəzəlləri çap olunub. Sonradan bir çox qəzet və jurnallarda dərc olunan satirik şeirləri ona oxucu rəğbəti qazandırıb.
Baba Pünhan ilk qəzəlini 13-14 yaşlarında yazıb. Yaradıcılığa lirik şeirlər və məhəbbət qəzəlləri ilə başlasa da, 1990-cı illərdən etibarən satirik yaradıcılığa üstünlük verib. O, dövrünün haqsızlıqlarını, cəmiyyətdəki nöqsanları və sosial problemləri kəskin satira ilə tənqid edib.
Şairin əsərləri müxtəlif mətbu orqanlarda dərc olunub. 1998-ci ildə ANS telekanalının "Qulp" verilişinə dəvət edildikdən sonra "Lirika" rubrikasında səsləndirdiyi satirik qəzəllərlə daha geniş auditoriyanın rəğbətini qazanıb.
2000-ci ildə "Azərbaycan" jurnalı tərəfindən "Hikmət Ziya" adına mükafata layiq görülüb. Həmin il Azərbaycan Yazıçılar İttifaqı tərəfindən satirik yazılar üzrə ilin qalibi elan edilib.
Baba Pünhan 2004-cü il aprelin 17-də vəfat edib. Mərhum şair doğulduğu Kürdəxanı qəsəbəsində dəfn olunub.
