Bakı Ağır Cinayətlər Məhkəməsində keçmiş həyat yoldaşı Amalya Qəhrəmanovanı küçədə güllələyərək qətlə yetirməkdə təqsirləndirilən Zaur Qəhrəmanovun cinayət işi üzrə hazırlıq iclası keçirilib.
Məhkəmədə təqsirləndirilən şəxsin anket məlumatları dəqiqləşdirilib, ona hüquq və vəzifələri izah olunub. Məhkəmə baxışı noyabrın 18-nə təyin edilib.
Xatırladaq ki, hadisə bu il iyulun 9-da Nəsimi rayonu, Mircəlal küçəsi, 2a ünvanında baş verib.
Məlumata görə, Zaur Qəhrəmanov bir müddət əvvəl boşandığı Amalya Qəhrəmanovadan azyaşlı övladını götürmək istəyib. Qadının buna etiraz etməsi tərəflər arasında mübahisəyə səbəb olub.
Hadisə günü Zaur ov tüfəngi ilə BMW markalı avtomobilində Amalyanın işlədiyi aptekin qarşısına gəlib. Uşağı avtomobilə əyləşdirən ata oradan uzaqlaşmaq istəyərkən Amalya övladını ondan alaraq aptekə qaçıb.
Bundan sonra Zaur avtomobildəki ov tüfəngini götürərək qadının arxasınca gedib. Amalya uşağı aptekdə qoyaraq qaçmağa çalışsa da, Zaur onu yaxalayaraq tüfənglə qətlə yetirib.
Faktla bağlı cinayət işi başlanılıb, Zaur Qəhrəmanov barəsində həbs qətimkan tədbiri seçilib.
Mənbə: lent.az
