Bakının Yasamal rayonunda 50 yaşlı kişi ögey bacısına xəsarət yetirməkdə ittiham olunub.
Hadisə S.Dadaşov küçəsində baş verib. 1976-cı il təvəllüdlü Tacəddin yaşadıqları evin həyətində ögey bacıları ilə mübahisə edib. İttihama görə, münaqişə zamanı o, ögey bacısı Aygünün sol ayağına iki dəfə təpik vurub.
Məhkəmədə ifadə verən Tacəddin ittihamı qəbul etməyib. O bildirib ki, hadisə günü ögey bacısı Təhminə ona "keçəl" deyərək üstünə hücum edib və boğazından tutub. O isə qadını kənara itələyərək oradan uzaqlaşıb. Daha sonra digər ögey bacısı Aygünün də onunla mübahisə etdiyini və əlindəki boruya bənzər əşya ilə ona zərbələr endirdiyini iddia edib.
Zərərçəkmiş Aygün isə ifadəsində qardaşının bacısı Təhminəni döydüyünü gördüyünü, onları ayırmağa çalışarkən Tacəddinin onun ayağına təpik vurduğunu bildirib. O, qardaşının evə sahib olmaq məqsədilə onu öldürmək istədiyini də iddia edib.
Faktla bağlı Tacəddinə Cinayət Məcəlləsinin 128-ci maddəsi ilə ittiham irəli sürülüb.
Yasamal Rayon Məhkəməsinin hökmü ilə onun təqsiri sübuta yetirilmədiyindən barəsində bəraət hökmü çıxarılıb.
Mənbə: demokrat.az
