Zəfər Günü və Dövlət Bayrağı Günü ilə əlaqədar noyabrın 6-dan 9-dək qeyri-iş günlərində avtovağzallar gücləndirilmiş iş rejimində işləyəcək. Bu barədə 4 noyabr tarixində Quru Nəqliyyatı Agentliyinin mətbuat xidməti məlumat verib.
Bakı Beynəlxalq Avtovağzal Kompleksi avtobusların xətlərdən çıxma intervalına, eləcə də sürücülərin sərnişindaşıma zamanı təhlükəsizlik qaydalarına riayət etmələrinə nəzarət edəcək.
Sərnişin sıxlığının qarşısını almaq üçün xəttə lazımi sayda əlavə avtobuslar buraxılacaq.
Biletləri avtovağzalın kassalarından, həmçinin avtovagzal.az saytından onlayn əldə etmək olar. Vətəndaşlar 1414 çağrı mərkəzinə zəng edərək onları maraqlandıran məsələlərlə bağlı ətraflı məlumat ala bilərlər.
