Bakıda “BYF EduExpo 2022” təhsil sərgi-yarmarkası keçiriləcək. Bu haqda 22 sentyabr tarixində Report məlumat verib.
50 şirkətin iştirakı ilə təhsil sərgi-yarmarkası “Gələcəyini inşa et!” devizi ilə 30 sentyabr-2 oktyabr tarixlərində baş tutacaq. Sərgi çərçivəsində təhsil, psixologiya və fərdi inkişaf ekspertləri tərəfindən müvafiq mövzularda seminarlar, sərgi iştirakçıları üçün “B2B” və “B2C” görüşlər nəzərdə tutulur.
Sərgi çərçivəsində ziyarətçilər xarici dil kursları və imtahan mərkəzləri, psixoloji testlər və xidmətlər, yerli və beynəlxalq özəl məktəblərin proqramları, aparıcı ali təhsil müəssisələrinə müraciət və qəbul prosesi, təhsil və xidmət haqqı və digər məsələlərlə bağlı məlumat almaq imkanı əldə edəcəklər.
Sərgidə iştirak etmək üçün əvvəlcədən qeydiyyatdan keçmək lazımdır. Ziyarətçilər üçün giriş tam sərbəstdir.
