Paytaxtda sərnişinlər ictimai nəqliyyatın fəaliyyətindən narazıdırlar. Bu haqda 24 sentyabr tarixində Bakuplus.az ATV-yə istinadən məlumat verir.
Sərnişinlər deyir ki, bəzən bir saata yaxın avtobus gözləməli olurlar. Günün pik saatlarında avtobuslar arasında intervalın azalacağını gözlənilsə də, əksi müşahidə olunur.
Sürücülər isə gecikmənin səbəbini şəhərdə sıxlıqla əlaqələndirirlər. Nəqliyyat üzrə ekspert Elməddin Muradlı isə hesab edir ki, dayanacaqda sərnişinlərin uzun müddət gözləməsinin səbəbi marşrut xətlərində avtobusların sayının az olmasıdır:
“BNA iddia edir ki, Bakı şəhərində bu gün gündə 2200 avtobus xəttə çıxır. Bizim apardığımız araşdırmalar isə göstərir ki, 1200-dən o tərəfə keçmir. Bu gün ümumilikdə Bakı şəhərinə 2500-2600 avtobus lazımdır. Yəni gündəlik xəttə çıxan avtobuslar lazımdır. BakuBus MMC-nin qarajında saxlanılan o avtobuslar xəttə buraxılarsa böyük bir kütlənin vaxtında mənzil başına çatmasına kömək edəcək”.
BNA-dan faktla bağlı bildirilib ki, son günlər avtobusların gecikməsinin səbəbi tıxaclardır:
“Avtobus zolaqlarının bütün marşrut şəbəkəsi boyunca təşkilinə nail olunmalıdır. Bu məsələ həllini taparsa avtobusların qrafik üzrə hərəkəti böyük ölçüdə təmin olunacaq. Avtobus sayına gəldikdə isə, bu sahədə də müəyyən çatışmazlıqların olması reallıqdır. Amma indiki vəziyyətdə avtobus sayının artırılması məsələnin həlli yolu deyil”.
