Artıq gəlinliyi təkcə kirayələmək üçün deyil, geyinib yoxlamaq üçün də ödəniş tələb edilir. Bu haqda BakuPlus.az Xəzər Xəbərə istinadən bu gün, 20 oktyabr tarixində xəbər verir.
Bakı şəhərində aparılan sorğuya əsasən, bəzi sakinlər bu cür halla qarşılaşdıqlarını bildiriblər. Onlar gəlinliyi yoxlamaq üçün pul tələb olunmasını düzgün hesab etmədiklərini qeyd ediblər.
Geyinilib yoxlanması üçün tələb olunan məbləğ 40, 50, hətta 100 manata çatır. Ödəniş tələb edən mağazalar isə bunu müxtəlif səbəblərlə izah edirlər.
Sorğuda iştirak edən bəzi gəlinlik mağazalarının sahiblərinin sözlərinə əsasən, pul tələb edən obyektlərin çoxu satışı az olan mağazalardır.
Hüquqşünas Samir Qasımov məsələyə belə fikir bildirib:
“Sahibkar əlavə vaxtının getməsi, malının keyfiyyətinin aşağı düşməsi və alıcının həmin gəlinliyi kirayə götürüb-götürməməsindən asılı olmayaraq pul istəyə bilər. Digər tərəfdən isə istehlakçıların hüquqlarının müdafiəsi haqqında qanunvericiliyə əsasən, hər bir şəxsin almaq istədiyi mal barədə məlumat əldə etmək hüququ var”.
