Aidiyyəti qurumlara hələ 2011-ci ildə rəsmi icazə olmadan tikilən evlərin sənədləşdirilməsi ilə bağlı xüsusi tapşırıqlar verilsə də, hələ də prosesin icrasına başlanmayıb. Nəticədə, xüsusilə paytaxt və ətraf rayonlarda yüz minlərlə mənzil havada qalıb. Bu haqda bu gün, 3 oktyabr tarixində Bakuplus.az Xəzər Xəbər-ə istinadən məlumat verir.
Ekspertlərin hesablamalarına görə, hər il ölkədə 25 mindən çox sənədsiz ev tikilir.
Xəzər rayonu, Binə kəndinin sakinləri deyirlər ki, çıxarış almaq üçün dəfələrlə aidiyyəti qurumlara müraciət ediblər, amma heç bir nəticə olmayıb.
Əmlak üzrə ekspert Ramil Osmanlının sözlərinə görə, hazırda həm şəhərin mərkəzində, həm də ətraf qəsəbələrdə sənədsiz evlər qalıb. Ekspert bu məsələdə əsas işin icra hakimiyyətlərinin üzərinə düşdüyündən razıdır.
Ramil Osmanlı deyir ki, zaman keçdikcə bu mənzillərin çoxu bələdiyyə sənədləri ilə tikilib. Amma indi bu sənədlər çıxarış almaq üçün əsas hesab edilmir. Ekspertin sözlərinə görə, sənədsiz mənzillərə çıxarışların verilməsinin gecikməsi təhlükəli ərazilərdə tikilən evlərin sökülməsi prosesini ləngidir.
Xəzər rayonu, Binə qəsəbəsində tikilən evlərin bir qismi dəmir yolu xəttinin yaxınlığında yerləşir. Bu da həmin mənzillərin gələcəkdə təchizatında problemlər yaradır.
Deputat Razi Nurullayev hesab edir ki, sökülmək üçün mənzillərin və evlərin verilməsi ilə bağlı məsələlər yaxın vaxtlarda öz həllini tapmalıdır.
“Prezidentin sərəncamında belə bir məsələ də var idi ki, əgər o, dəmir yolunun yanında yerləşirsə, yüksək gərginlikli elektrik xətlərinin altında tikilibsə və ya qaz borularının yanındadırsa, o zaman həmin evlərə kompensasiya verilməlidir. Və bu günə kimi biz gördük ki, dövlət həqiqətən də insanların evinin sənədi olmasa belə güzəştə gedir, kompensasiya verir”, - millət vəlkili vurğulayıb.
