Bakıda Hindistan məhsullarının təqdim edildiyi "Best of India" adlı sərgi keçiriləcək. Bu haqda bu gün, 31 avqust tarixində Bakuplus.az Hindistanın Azərbaycandakı səfirliyinə istinadən xəbər verir.
Sərgi sentyabrın 2-dən 12-dək Bakı İdman Sarayında keçiriləcək.
“Best of India” tədbiri daim xarici ölkələrdə keçirilir və dünyanı Hindistan sənayesinin geyim, tekstil və həyat tərzi məhsulları ilə tanış edir.
Hindistan səfirliyinin müvəqqəti işlər vəkili Vinay Kumar bildirib ki, bu il Bakıda 9-cu dəfə keçirilən sərgidə Hindistanın 65-ə yaxın şirkəti iştirak edəcək. Tədbirin əsas məqamı qonaqların sərginin ilk üç günü ərzində saat 13:00-dan 16:00-a kimi baxa biləcəkləri “Hindistan yaradıcılığı səhnədə” dəb nümayişi olacaq.
Tədbirdə, həmçinin Hindistan mədəni irsinin xalq rəqsləri, Bollivud mahnıları, ənənəvi alət ifaçılığı, xına sənəti və s. nümayiş olunacaq. Bundan əlavə, tədbir zamanı Hindistanın turizm, mədəniyyət və investisiya imkanlarını tanıtmaq üçün davamlı olaraq Azərbaycan dilində subtitrli videoçarxlar təqdim olunacaq.
