Paytaxt qəbiristanlıqlarında yerlərin qiyməti 10.000-30.000 manat arasında dəyişir. Bu haqda BakuPlus.az Apa TV-yə istinadən bu gün, 4 noyabr tarixində xəbər verir.
Yasamal qəbiristanlığında nə müdiriyyət, nə də işçilərdən heç kəs bu barədə açıqlama verməyib. Sakinlərin sözlərinə görə isə qiymətlər 10.000-30.000 manat arasında dəyişir. Bu qəbirin yerləşdiyi ərazidən, yəni yola yaxın olub-olmaması, dikdə yoxsa çökəkdə yerləşməsindən asılıdır.
Günəşli qəbiristanlığında da eyni vəziyyət hökm sürür. Burada isə qiymətlər 4000-5000 manat arasında dəyişir.
Bilgəh qəbiristanlığında müdiriyyətin sözlərinə əsasən, burada yer tam olaraq pulsuzdur:
“Bir qəbir yeri hazırda 200 manata başa gəlir. Yəni ki, qəbiri qazdırmaq, tikmək və mərhumun basdırılmağı bu qiymətə gəlib çıxır. Bir adamın rəhmətə gedəni olduqda biz əlavə olaraq mərhumun basdırıldığı yerin yanında bir nəfərlik də yer veririk ki, gələcəkdə yoldaşı və ya oğlu dünyasını dəyişərsə, həmin adamı orada torpağa tapşıra bilsinlər”.
Sexlərdən birinin işçisi qəbirüstü abidələr barədə bildirib ki, qiymətlər daşın yerli və ya xarici istehsal olmasından asılı olaraq, 400-500 manatdan 5000 manata qədər dəyişir.
Deputat Fazil Mustafa qəbiristanlıqlardakı vəziyyəti belə şərh edib:
“Qəbiristanlıqlarla bağlı məsələ heç bir qanunla tənzimlənmir. Qanunla qəbiristanlıqların bələdiyyələrə verilməsi nəzərdə tutulurdu. Onların da pulu olmadığı üçün bunu nəzarətə götürə bilməyiblər. Təəssüflər olsun ki, Milli Məclisdə bununla bağlı fikirlər bildirilsə də, müzakirəyə çıxarılmadı”.
