Paytaxtın bir çox rayonlarında su problemi günümüzə qədər aktual qalır. Bu haqda BakuPlus.az oxucuları arasında sorğu keçirib.
Həmin ərazilər arasında Bakının mərkəzi ünvanları belə yer alır.
Xəzər rayonu, Binə Südçülük sovxozun sakinləri hələ də su maşınlarından faydalanırlar. Ərazidə yaşayanlar qeyd edirlər ki, pandemiya dövründə suyun Qala qəsəbəsindən çəkiləcəyi barədə sakinlərə məlumat verilib. Lakin bununla bağlı indiyə qədər heç bir iş görülməyib.
Köhnə Günəşli yaşayış massivi, Əmircan, Şüvəlan qəsəbələri, Binəqədi rayonu və 20-ci sahənin bəzi küçələrində su hələ də saatla verildiyindən yuxusuna haram qatıb su dolduranlar da az deyil. Sadalanan ərazilərdə suyun verilişi gündə 2-3 saat davam edir.
Paytaxtın “5 mərtəbə” adlanan ərazisinin sakinləri isə suyun qumlu olmasından şikayətlənirlər. Sırf bu səbəbdən onlar da sudaşıyan maşınlara müraciət etməli olurlar.
Albalılıq qəsəbəsi, Ləhiş bağları və Xırdalan şəhərinin bəzi hissələri suya həsrət qalan ərazilər sırasındadır.
