Bakıda sürücülər “VAZ” dairəsi deyilən dairənin ləğv olunmasından narazıdırlar. Bu haqda 3 oktyabr tarixində Bakuplus.az ApaTV-yə istinadən xəbər verir.
Sakinlər əvvəllər şəhərə doğru getmək üçün “VAZ” dairəsindən istifadə edirdilər. Amma hazırda bu dairə ləğv olunduğundan, orada yaşayan sakinlər və digər avtomobillər məcburiyyətdən Saray qəsəbəsinə doğru 7 km məsafə qət etmək, bu yolla şəhərə getmək məcburiyyətindədirlər.
Sözügedən dairə təxminən bir aya yaxındır ki, ləğv edilib. Bu da 20 min nəfərə yaxın sakinin yaşadığı Masazır və Abşeron Gənclər Şəhərciyinin, eləcə də ətraf ərazidə yaşayan sakinlərin etirazına səbəb olub. Bundan başqa, bu yolla hərəkət edən 199 saylı yeganə müntəzəm marşrut xəttinin fəaliyyəti də pozulub. Sözügedən yolda edilən dəyişikliyə görə sürücülər hər gün 6 km əlavə yol qət edirlər. Bu yolda, həmçinin nə yol hərəkətlərini tənzimləyən lövhələr var, nə də işıqfor.
Məsələ ilə bağlı Baş Dövlət Yol Polisi İdarəsi bildirir ki, “VAZ” dairəsi yolda yaranan uzun-uzadı tıxaclar səbəbindən ləğv edilib:
“Layihənin icrasının sonrakı mərhələsində daha yaxın məsafədə geriyə dönmə zolağının yaradılması nəzərdə tutulub. Hazırda sürücülər bir istiqamət üzrə əlavə 2,8 km məsafə qət etməklə heç bir sıxlıq problemi yaşamadan geri dönmə edib hərəkətlərinə davam edə bilərlər ki, bununla da tıxacda qalmadan, rahat gedə bilərlər”.
